Plantun de Prouvènço

Pèr coumpara dos planto d'encò nostre

Ambrosia psilostachya & Ranunculus acris

Ambrosia psilostachya

Asteraceae Compositae

Nom en français : Ambroisie à épis grêles.

Descripcioun :
L'ambròsi-dis-espigo-primo trachis dins li sablo, souvènt pas trop liuen de la mar o dis oustau. Sèmblo proun à sa cousino di fueio d'artemiso, Ambrosia artemisiifolia, pamens es uno planto renadivo que fai un rizoumo dins la sablo o lou limas. Apoundèn que flouris mai d'ouro e que douno d'enflourejado pu courto.

Usanço :
La planto èi forço alergogèno e pèr acò se dèu d'èstre derrabado. D'estùdi s'interèsson pamens i prouprieta antimicroubiano de l'isabelino, mouleculo secretado pèr la planto que poudrié servi dins la lucho contro li baterìo encò l'ome.

Port : Erbo
Taio : 10 à 60 cm
Fueio : alterno
Tipe bioulougico : Geoufite
Cicle bioulougico : Planto renadivo

Gènre : Ambrosia
Famiho : Asteraceae
Famiho classico : Compositae
Tribu : Heliantheae
Ordre : Asterales

Coulour de la flour : Verdo
Petalo : >6
Ø (o loungour) enflourejado : 6 à 10 cm
Flourido : Printèms - Estiéu

Sòu : Ca (Si)
Autour basso e auto : 0 à 200 m
Aparado : Noun
Remarco : Planto envahissènto
Jun à setèmbre

Liò : Sablo - Escoumbre e proche dis oustau - Ermas - Culturo
Estànci : Mesoumediterran à Coulinen
Couroulougi : Óurigino Americo dóu Nord
Ref. sc. : Ambrosia psilostachya DC., 1836

Boutoun-d'or

Ranunculus acris

Ranunculaceae

Àutri noum : Bacineto, Poumpoun-d'or, Loup-pauto, Pato-de-loup, Bacin-d'or.

Noms en français : Renoncule âcre, Bouton-d'or.

Descripcioun :
Lou boutoun-d'or es uno planto couneigudo mai pas toujour bèn destriado de si cousino di flour jauno peréu. Arregarda li sepalo peludo que dèvon èstre pegado contro li petalo e li fueio telado e descoupado (mai pas fin qu'au pecou). Lis akène negre an un bè un pau recourba.

Usanço :
Tóuti li ranouncle caupon de proutouanemounino, empouisounanto. Avèn pas trouba d'usanço particulièro au nostre. D'ùni pople indian d'Americo n'en manjon li fueio après en agué fa bouli mant'un cop li fueio. Aquéli servien peréu pèr sougna li mau de tèsto. Pòu tencha la lano en vióulet emé de bicarbounato de soudo.